टिपतोस का कधी तू?

चुपचाप आसवांना, टिपतोस का कधी तू,
नादान त्या व्रणांना, स्मरतोस का कधी तू ?

अस्तास सूर्य जाता, गंधाळली कहाणी,
त्या कोवळ्या खुणांना, पुसतोस का कधी तू ?

ते रान सांजओले, व्याकूळले किनारे,
त्या गूढशा तणांना, धरतोस का कधी तू ?

पाण्यात कोरलेली, नक्षी तुझ्याच नावे,
बेभानल्या क्षणांना, भरतोस का कधी तू ?

वाटा दुरावलेल्या, काळास कोण रोखे,
अंधार आधणांना, हरतोस का कधी तू?

आहेत वादळे ही, डोहात संयमाच्या,
ओढाळ कारणांना, हसतोस का कधी तू ?

(सौ. शैलजा शेवडे)