कुणास्तव असे उगाच झुरणे

 कुणास्तव असे, उगाच झुरणे, नको रे मना,

पहा परत नाचला, मयुर हा तुझ्या अंगणा,

किती बरसल्या, तुझ्याच करिता, सरी सांग ना,

कुणी तुज दिले, असे किरण कोवळे माळण्या |

.

जरी समय तो, उदास गमतो, तिन्हीसांजचा,

तरी अटळ रे, मना क्षण असे, रवी यायचा,

अहा परत, ओंजळीत भरती, सुखाच्या खुणा ,

उगाच कुढसी, किती क्षणिक ती,असे वेदना |

.

पहा दशदिशा किती खुणवती, कधीच्या तुला,

अता उघड पंख रे, पकड तो, नभीचा झुला,

तुझे क्षितिज ते क्षणात गवसे, खुले हास ना,

कशास मग ते ,निराश बनणे, असे रे मना |

.

नवा बहर ही वनात मधुमास आला अहा ,

नवे कवन ते मनात फुलते म्हणूनी पहा ,

नवीन गत ही, नवी फिरतही, नवा राग ना,

तरी सम कुठे, खुणा समज, ताल दे धाधिना |

.

.

(सौ. शैलजा शेवडे)

.