शूर्पणखा

शुर्पणखा....

.

श्यामलवर्णी, कमललोचनी, तपस्वी सुंदर,सुकुमारावर,

शुर्पणखा भाळली, राक्षसी रामावर भाळली  |

.

सुमुखी रामावर ती दुर्मुखी, सुलोचनावर ती विरूपाक्षी,

मृदुभाषीवर कर्कश्या  ती, काममोहित जाहली, 

राक्षसी रामावर भाळली |

.

बोले भयंकर उग्र राक्षसी , 'कोण  असे तू तरुण तापसी?

आला कुठूनी भार्येसह या , निबिड अशा जंगली ?

राक्षसी रामावर भाळली |

.

'राम बोले, पितृ आज्ञे , आलो येथे सीतेसंगे ,

बंधू माझा हा लक्ष्मण , माझी जणू सावली |

राक्षसी रामावर भाळली |

.

महाबलाढ्य दशाननाची , भगिनी मी परी 

पाहताक्षणी तुला कशी ती, प्रीत मनी जागली,

राक्षसी रामावर भाळली  | 

 

.

पाहताक्षणी तुला उत्तमा, आकर्षित मी झाले रामा,

प्राणनाथच तू माझा, मी  खूण  मनी  बांधली 

राक्षसी रामावर भाळली |

.

मी  स्वच्छंद बल गामिनी ,तू  धनुर्धारी वीर पराक्रमी, 

भ्रतार, हो माझा तू,  फिरू मुक्तपणे त्रिस्थळी ,

राक्षसी रामावर भाळली |

नाही शोभत तुला अशी ही, कृशोदर अशी कुरूप भामिनी,

त्याग तिला, हे महान वीरा, सुंदर  जोडी अपुली ,'

राक्षसी रामावर भाळली |

.

'खाते मी तव  विजोड भार्या, आणि तुझ्या या बंधूला पण 

मुक्त तू अन मुक्त मीही  , मौज करू जंगली,'

राक्षसी रामावर भाळली |

.

राक्षसीचे प्रेम राक्षसी, प्रेमाची ती रीत राक्षसी,

क्रूरपणे सीतेला  ती,  भक्षाया   धावली,

राक्षसी रामावर भाळली |

आज्ञेने रामाच्या मग,  खड्ग उपसून लक्ष्मणाने ,

नाक कान कापून , विरूपा तिज केली, 

राक्षसी रामावर भाळली |

.

.

(सौ. शैलजा भा. शेवडे)

.