वनवासाला निघता राम

वनवासाला निघता राम, निरोप तो घेण्या आले,

शोकसंतप्त होई  सीता , उपहासे त्यांना बोले |

.

'काय बोलणे असे आपुले, पुरुषश्रेष्ठा हे रामा,

हसूच येते, बघा मला ते, ऐकुनी सारे, हे रामा |

.

पत्नी मी तुमची, वाटेकरी मी, तुमच्या सा-या भाग्याची,

सुखदुःखाची आणि आता वनवासाच्या त्या आज्ञेची |

.

वनात जाता, तुम्ही, तर, तुमच्यापुढे जाईन  आधी,

वाटेतले, दर्भ नी काटे, तुडवीन मी तुमच्या आधी |

.

प्रासादी ते नको राहणे, तुम्हांविण  ऐश्वर्य भोगणे,

पतीचरणाची छाया प्रिय मज , तुम्हांसवे अन वनी राहणे |

.

हे वीरा, हे नरोत्तमा,  ते ठावे मजला धर्म आचरण,

ब्रह्मचारिणी राहून हर्षे,  करीन मीही कालक्रमण |

.

का घालिता भीती मजला , वनातील, त्या क्लेशांची,

पर्णशय्येवर निजण्याची, कंटकाकीर्ण त्या मार्गांची?

.

प्रिय रामा, तुमच्यासंगे  ,सांगा मज भय कोणाचे? 

हिंस्त्र श्वापदे, दूर राहिली, नाही भयही इंद्राचे |

.

का तुमच्या मनी मज त्यागणे, का तुम्हां शंका येते,

सूर्यासम तेजस्वी तुम्ही, सारे म्हणती, ते खोटे?

.

वनवास आहे माझ्या नशिबी, माहित आहे, हे  रामा,

सांगितले हे ज्योतिष्यांनी , विवाहा आधीच मज , हे रामा |

.

 वियोग तुमचा नरक तुल्य मज, स्वर्गच माझा तुमच्या संगे,

जाणून घ्या हो, प्रीती माझी ही , घेऊन जा मज तुमच्या संगे |

.

प्रिय रामा, राघवा, रघुवीरा, नको राहणे, जगणे तुम्हांविण,

घेऊन जा मजला संगे, अन्यथा, करीन मी विषाचे प्राशन |

.

.

सौ. शैलजा शेवडे

तारीख ३१ मार्च २०२०

.

.