रघुपती होळी खेळतसे हो..

रघुपती होळी खेळतसे हो,

राम..म्हणजे चराचरात विराजमान असलेले ब्रह्मतत्त्व ....! रमन्ते योगिनः अस्मिन सा रामं उच्यते | योगी ज्या शून्यात रमतात, त्याला राम म्हणतात..राम आनंद आहे, आनंदाचा कंद आहे... आनंद द्यायला निर्गुण निराकाराने घेतलेले एक सुंदर रूप , म्हणजे राम....त्याच्या कथेत आनंदच आनंद...! मधुमास आला आहे..अयोध्येत होलिकोत्सव चालू आहे..त्याचे वर्णनही अत्यंत आनंददायी...!

.

वसंतातली धुंद हवा ती, तरुवर डोलती, पक्षी गती,

आम्रतरूवर मोहर सुंदर, पलाशपुष्पे रंग उधळती |

.

मोहक,कुसुमे, गंधित केशर, कुंकुमाने तबके सजती ,

अवधनगरी, हर्षित, हर्षित, शरयुतीरी सारी जमती |

.

कोणा हाती असे झांज तर , कोणा हाती असे खंजिरा,

कोणी उधळी गुलाल आणि, कोणी उधळत असे अबीरा |

.

कोणी वाजवी मृदुंग सुंदर, कोणी डफ करताल मनोहर,

कोणी गातसे, होळीगीत ते, शब्द, सूर, लय , मधुर खरोखर |

.

मुग्ध किशोरी, जनककुमारी ,लाज विलक्षण मुखकमलावरी,

पाहे रघुवीर शरयुतटावरी, हाती त्यांच्या कनक पिचकारी |

.

धडधड धडधड होई अंतरी,बघून सावळी मूर्त साजिरी,

समीप येती रघुपती राघव, खट्याळ भाव ते श्रीवदनावरी |

.

राम फेकती, रंग सीतेवरी, चिंब चिंब ती होई बावरी,

लज्जा सारून, गुलाल टाकी, मधुमासाची किमया न्यारी |

.

होळी आली, होळी आली, गाई लक्ष्मण रामसंगती,

भरत घेई, ढोलक हाती, सुगंधी केशर शत्रुघ्नामुठी |

.

वैदेही सह सर्व सख्याही, रंगाची ती करती उधळण,

दृश्य अलौकिक बघावया ते, जमती सारे ऋषी, देवगण |

.

रघुपती होळी खेळतसे हो, रघुपती होळी खेळतसे,

निराकार ते ब्रह्मची केवळ, रंगरंगीले होत असे |

.

.

(सौ. शैलजा शेवडे)

.