कुब्जा

कुरूप कुब्जा, दासी कुब्जा,

झुकलेली नित होते मी तर,

कोण मग ही आरशातली,

निर्मल ललना, अतीव सुंदर !

किती वाकुडी किती बापुडी

कधी न पाहिले मला दर्पणी ,

कोण मग ही आरशातली,

रंभा, उर्वशी दिव्य पद्मिनी |

.

मयूरमुकुटी, भक्तवत्सल,

नटवरनागर, असा श्रीहरी,

मधुरामार्गावरी पुकारी,

मला कृष्ण तो, 'अगं सुंदरी ' |

.

'लाव गंध मज ललाटावरी.

हसून म्हणे मज, तो ब्रजभूषण,

काय तयाचे रूप देखणे,

खुळ्यागत मी गेले हरवून |

.

चंदनउटी तया लावता,

स्पर्श तनुला, श्रीचरणांचा

कुरूप वक्रता,क्षणात गेली,

जयघोष मनी मग श्रीरंगाचा |

.

कायापालट नाही केवळ,

नाही केवळ कुबडच गेले,

मलीन मानस निघून गेले,

अंतर्बाह्य हरीची झाले |

.

काम क्रोध मोहाने होते,

त्रिवक्रा मी दुर्गुणी नारी

श्यामरंगात होई पवित्र

त्रिविक्रमाची जादू ही सारी |

.

प्रेमरस उद्दीप्त करी मग,

तो मुरलीधर, व्रजेन्द्रनंदन,

येईन नक्की तुझ्याकडे मी,

गेला सांगून, तो ब्रजमोहन |

.

सुंदर काया त्याची किमया,

करेन मग मी त्याला अर्पण,

येईल येईल तो ब्रजभूषण ,

धन्य धन्य मग होईल तनमन |

.

सौ.शैलजा शेवडे

.