काय झाले ते कळेना...

’योग नव्हता, ’ कोणि म्हणती, दैवलीला आकळेना,
हात हातातून सुटला, काय झाले ते कळेना ।

दोष तो नव्हता कुणाचा, कारणे काहीच नव्हती,
डोकवावा का दुरावा, काय झाले ते कळेना ।

मौन झाकोळून टाकी, पूल आहे मोडलेला,
बेट एकाकी कधीचे, काय झाले ते कळेना ।

टोकराव्या वाटते त्या, गूढ खपल्या वेदनेच्या,
स्तब्धता अंतर्मनाची, काय झाले ते कळेना ।

तोलती अश्रु कधीच्या, पापण्या हट्टी किती त्या,
धुमसता ज्वालामुखी हा. काय झाले ते कळेना ।

(सौ. शैलजा शेवडे )