मन गोकुळ हे

नको शंका मनी, नको फुका वाद,
रामा घाली साद, मनोभावे ।

अयोध्यापती तो, आहे क्षमाशील,
तारून जाशील, भवसिंधु ।

शबरीची उष्टी, चाखली ती बोरे,
ठेवील का तो रे, हीनभाव ?

जानकीचा राम, जाणुनीया घ्यावा,
मुखी येऊ द्यावा, निरंतर ।

असे सर्वांवरी, कृपादृष्टी ज्याची,
खात्री ठेव त्याची, रक्षिल तो ।

पतित पावन, राम आहे माझा,
राम आहे तुझा, प्रत्येकाचा ।

चार दिन जिणे, कशाला विवाद,
प्रेमाचा संवाद, राम राम ।


(सौ. शैलजा शेवडे)