छेडिला मल्हार तू माझ्याचसाठी, माझ्याचसाठी

लेऊन आले ग्रीष्मझळांना, त्या दुपारी भेटीसाठी,

छेडिला मल्हार तू, माझ्याचसाठी, माझ्याचसाठी ।

भारलेली मी खुळी, अन रोखलेले नजरभाले,

जाणीवा होत्या कुणाला,कोण ते मौनात बोले,

खुणवीत होती पावलांना, कोठली घुंगूरकाठी,

छेडिला मल्हार तू, माझ्याचसाठी, माझ्याचसाठी ।

मंत्रमुग्ध मी अन, गारूड तुझे संगीत होते,

दिडदा दिडदा, सतारीत,कोणते ते गीत होते,

काय लोकांना कळाव्या, कोठल्या रेशीमगाठी,

छेडिला मल्हार तू, माझ्याचसाठी, माझ्याचसाठी ।

पोळलेली पाऊले, वैशाखवणवा अंतरंगी,

कोसळे पाऊस कुठूनी, चिम्ब मी आनंदरंगी,

ही दुनिया कोणती रे, हा सुरांचा हात हाती,

छेडिला मल्हार तू, माझ्याचसाठी, माझ्याचसाठी ।(सौ.शैलजा शेवडे)