मन गोकुळ हे

 धगधगणा-या ज्वालेचे हे गा-हाणे कृष्णा,

तडफडणा-या तृष्णेचे आक्रोशणे कृष्णा,

रुद्ध मनाने तुला सांगते , 

ऐक रे कृष्णा , न्याय दे कृष्णा....|

.

याज्ञसेनी मी, तुझी सखी मी,

पांडवांची पत्नी रे मी, 

तरीही माझी बेअब्रू ती, 

कशी झाली कृष्णा, न्याय दे कृष्णा..|

.

कमललोचना, तुझ्या सखीला,

खेचूनी नेले धरुनी कुंतला,

दुःशासन तो, अधमाला त्या,

कसली रे शिक्षा? न्याय दे कृष्णा |

.

कापत होते, लज्जेने रे,

भीतीने अन अपमानाने,

रजस्वला त्या, मला पाहूनी,

हसतो पापात्मा, न्याय दे कृष्णा |

.

हात घालिती मम वस्त्राला,

मांडी दावती बसावयाला,

उपभोगाया उत्सुक पापी, 

भरसभेत मजला, न्याय दे कृष्णा |

.

माझ्यासाठी कोणीही नाही,

पिता, पुत्र अन बंधूही नाही,

मधुसूदना रे, तू ही नाही, 

उपेक्षसी वेदना, न्याय दे कृष्णा |

.

शरण तुला रे, तुलाच कृष्णा,

तूची समर्थ, मला रक्षिण्या,

गौरवशाली तुझी सखी रे,

जाण तू कृष्णा, न्याय दे कृष्णा |

.

( सौ. शैलजा भा. शेवडे )