रंगलेल्या मैफिलीची

रंगलेल्या मैफिलीची, ती त-हा मज न्यारी होती,

मी दिलेली वेदना तुज, मजहूनीही प्यारी होती.

वाहव्वा जल्लोष होता, शब्दशब्दा दाद होती,

न जाणे कोणत्या सुरेने झिंगलेली सारी होती |

.

मी दिलेल्या आसवांचे, शब्दमोती होत होते,

बाजारी अन मैफिलीच्या, लिलाव त्यांचे होत होते,

शुष्क डोळ्यांनी उभी,गर्दीतली मी एक होते,

गणगोत ते तुजभोवती, दुर्लक्षित मी होत होते |

.

ती क्षणांची भूल होती, मृगजळाची हूल होती,

प्राक्तनाने घेतलेली एक फसवी झूल होती,

झेपावणा-या वादळाची, ती एक चाहूल होती,

भाबड्या डोळ्यात माझ्या, फेकलेली धूळ होती |

होष घेऊनी, जाण्या तुझा, वेदनेची साकी होती,

ज्ञात ते नव्हते तुला पण, ती कहाणी बाकी होती,

रिक्त ओंजळीत माझ्या आसवांची ओल होती,

कैफियत माझी परी ती, माझ्यापरी एकाकी होती |