वंदन वंदन मोक्षप्रदा

प्रथम तुला नमितो, स्मरतो, गणराज गजानन विघ्नहरा,

भवभयतारक हे गणनायक संकटनाशक सौख्यकरा ।

सकलचराचर व्यापक, धारक पालक पोषक पाशधरा,

कणकण होत विलीन तुझ्यात, फिरून तुझ्यातुन जन्म खरा ।


सगुण कुणी तुजला म्हणती, पुजती, भजती, व्रत आचरती,

गजवदना तव रूप मनोहर, रेखित मानस तोषवती ।

प्रमथपते अति गूढ अनादि  अपार गुणेश तुला वदती,

प्रणवरुपात तुला बघती, तरती भवसागर अल्पमती   ।


तगमग ही हृदयात क्षणोक्षण जाण दयाघन श्रीवरदा,

पदकमलावर  जीवन अर्पण, दे  मज दर्शन  शांतिप्रदा ।

गजमुख श्रीगणनायक तारक  ध्यास तुझा मज भास सदा,

अविरत  चिंतन  ध्यान  गजानन वंदन वंदन मोक्षप्रदा ।


(  सौ. शैलजा शेवडे )